Hmeichhiate tana 33% dah chungchang zau zawka sawiho a ngai : Nagaland minister
Nagaland minister leh state BJP president Temjen Imna Along chuan, urbal local bodies (ULB)-a hmeichhiate puala 33% dan chungchang chu stateholder hrang hrangten zau zawka an la sawiho a ngai a ni, a ti.
Higher education leh tourism minister, Along chuan state sorkar chuan UBL inthlan hi buatsaih a nih theihna atan organisation hrang hrang, naga civil society leh NGO-te hemi chungchang hi a sawipui leh phawt a ngai a ni, tiin a sawi.
Naga organisaton tam tak chuan ULB-a hmeichhiate puala seat hran dah chu an hnam tihdan phung a ni lo tih sawiin, an duh lo a ni. Tribal pawl leh civil society hrang hrangte women reservation siam duh lohna an lantir a, Nagaland Municipal Act, 2021 ennawn an phut hnuah state assembly chuan Nagaland Municipal Act hi a lo ṭhiat tawh a ni.
Mahse Supreme Court chuan state election commissioner-in hriattirna a lo tihchhuah tawh angin, May 16-ah ULB inthlan chu buatsaih turin Nagaland sorkar a hriattir a ni. Sorkar laipui hnenah, municipality leh town council inthlanah seat awm zat aṭanga hmun thuma ṭhena hmun khat hmeichhiate tana dah tura tih chu Nagaland hian a palzut ngawt thei em tih sawichiang turin April 17 khan a lo hrih tawh bawk. Kar hnih chhunga sawifiah turin hun a pe.
Nagaland Municipal Act, 2001 ṭhiah a nih hnuah, Naga Mothers' Association (NMA) leh hmeichhe pawl dangte chuan ULB-a hmeichhiate tana seat 33% dah ngei phutin lungawi lohna an lantir ve leh bawk. NMA aiawhte hian state governor La Ganesan pawh hmuin, state sorkar chuan hmeichhe pawl aiawhte tumah rawn loin Nagaland Municipal Act hi a ṭhiat tih an hrilh a ni.