Manipur-ah Hri kai 3,000 chuang awm
Manipur-ah Covid-19 kai an la pung zel a, Thawhlehni khan mi 98 in hri an kai tih hmuh belh leh niin, hri kai hmuh chhuah tawh hi 2,018 an ni tawh a ni.
Thawhlehnia hri kai hmuh chhuah thar mi 98 zinga 34 hi Central Armed Police Force (CAPF) mi leh sa an ni a, mi 64 chu hmun danga zin chhuahna nei lo an ni bawk. Hri kai hmuh tawh zinga 1,814 chu enkawl dam an ni tawh a, mi pasarihin an thihpui tawh thung a ni.
Containment zone-ah Police station puang
Thoubal district-a Lilong police station chu Covid-19 containment zone-a puan niin, khar zui nghal a ni. District thuneitute chuan he station-a duty police pakhatin hri a kai tih hriat a nih avangin khar a ni tih an sawi. Station-a duty dangte pawh an station compound chhungah hian inkhung hrang nghal tura tih a ni.
Hri kai awm vangin JNIMS dept khar
Imphal-a Jawaharlal Nehru Institute of Medical Sciences (JNIMS) Hospital-a accident and trauma center (ATC) chu damlo enkawl zingah Covid-19 kai a awm aṭangin Thawhṭanni zan aṭang khan khar a ni.
JNIMS medical superintendent, Prof T Rajen Singh chuan ATC-a enkawl lai pakhat, Lilong khua a mi chu Covid-19 a kai tih hriat a nih avangin, damlo dangte leh thawktute tan venthawn thilah he department hi khar rih a ni tih a sawi. Damlo awmpuitu, a fapa pawh a sample lak a nih hnuah a positive tih hriat a ni bawk.