Manipur : Tribal zirlaiten ST List-a Meitei hnam telh duh lo

Manipur tribal zirlai pawl, All Tribal Students' Union Manipur (ATSUM) chuan Manipur High Court-in Scheduled Tribe (ST) list-a Meitei hnam telh tura sorkar laipuia rawtna thlen tura Manipur sorkar a hriattir chuan dem leh, an pawm loh thu an sawi.

Tribal zirlaite chuan High Court rorel dan chu tribal mipuite duhdan kalh a ni, an ti. Court chuan petition thehlutute thlirna lam chauh a thlirpui nia sawiin, court-in he thupek a tichhhuah ni, April 19 chu Manipur tribal mipuite tan chuan 'black letter day' a ni, tiin ATSUM general secretary S Andria chuan a sawi a ni.

Meitei hnam ngenna anga, ST list-a telh an nih ve theihna tura sorkar laipuiah rawtna thlen tura Manipur High Court-in state sorkar a hriattir hnuah, ATSUM hian state chhunga tribal zirlai pawl hrang hrang meeting chu Imphal-ah a ko zui ve nghal a ni. "State chhunga khawtlang dinhmun leh sum lamah pawh a dinhmun ṭha zawkin ST status an phut hi thil awm lo tak a ni. Constitution ST status hmanga a venhim, tribal mipuite chuan an himna chungchangah hlauhthawnna an neih phah a ni," tiin Adria chuan a sawi.

Zirlai pawl chuan kawng khat chauh thlira thutlukna siam a nih danah state sorkar pawh an dem tel tih an sawi a, an remtihpui a ni, an ti. Sorkar laipuia rawtna thlen lo turin state sorkar chu an theih dan kawng kawngin nawr an tum tih an sawi bawk. Meitei-te ST status pek chuan state chhunga tribal-te dikna chanvo thengin a nghawng a, state mipuite inpumkhatna leh lungrualna pawh a tichhe thei dawn a ni, an ti.