Sorkar ram aṭanga chhuahtirte enkawl zui danah Assam sorkar chungah Gauhati HC a lungawi lo

Gauhati High Court chuan Assam sorkarin dan loa sorkar rama awm a chhuahtir a enkawl danah a lungawi lo tih sawiin, heng mite hi bawng ang maiin camp-ah enkawl an ni, a ti.

Court chuan dan loa sorkar rama lo awmte chhuahitr chungchangah state sorkar hmalakna chu ṭha a tih thu a sawi rualin, heng hmun aṭanga a hnawhchhuahte chhawmdawl leh awm zuina tur chu a hmain ruahmanna felfai tak a lo nei tur a ni, tiin a sawi.

Chief justice Sandeep Mehta leh justice Mridul Kumar Kalita awmna division bench chuan, sorkar ram aṭanga hnawhchhuah, temporary shelter home-a awm mek naupangten hun harsa an tawh chungchanga PIL thehluh a ngaihtuahnaah, state sorkar chunga a lungawi loh thu ṭawngkamin a sawi a ni. Temporary camp tlawha zirchiangtu, senior advocate Bhaskar Dev Konwar report thehluh an zirchian hnuah, chief justice Mehta chuan thil vanduaithlak leh pawi tak chu heng mipuite hi hnam khat vek an ni, a ti. "Engvangin nge tarpaulin hmang maia siam, temporary shelter-ah hian bawng ang maia mipuite in dah?" tiin a zawt. Hetianga mihring puite tih hi khawngaihna tlakchhamna nasa ber a ni tih a sawi zui.

Konwar hian report a thehluh rual hian camp thlalakte pawh a dah tel a, mihring an dahna hmun chu sazu kua ang mai a ni tiin,an chen tirna hmun ai chuan thingtlang bawng inte pawh a ṭha hle zawk a ni, a ti.