September-ah Agartala-Kolkata (via Bangladesh) rel kawng hawng dawn

Bangladesh khawpui Dhaka kaltlanga Agartala, Tripura leh Kolkata, West Bengal rel kawng siam chu September thla hian hawn a ni dawn.

Tripura transport minister Sushanta Chowdhury chuan rel kawng thar hian Agartala leh Kolkata inkara kalna atan hun sen ngai, darkar 31 chu darkar 10 velin a tihtlem phah dawn a ni, a ti. Rel kawng siam hna hi India ram lamah chuan 85% zawh a ni tawh a, Bangladesh-ah 75% zawh a ni tawh tih a sawi. He project hi kum 2020-a zawh tura ruahman kha a ni a, mahse ram neitute nena buaina leh Covid-19 hri leng avangin hna thawh a khaihlak nasa a, kumin September thlaah hawn theih beisei a ni ta chauh a ni.