AP-a border village 336-ten 4G connectivity nei dawn

Arunachal Pradesh-a border village 336-te 4G mobile connection pekna turin network tower 254 chu Inrinni khan hawn a ni.

Sorkar laipui chuan Arunachal Pradesh-a thingtlang khaw 3,721-te connection pekna turin, 4G mobile tower 2,605 siam a lo remti tawh a, hemi atan hian Rs vbc 2,675 ruahman a ni.

Itanagar-a mobile tower 254 hawnna inkhawm buatsaih hi union law minister Kiren Rijiju leh union telecom and railways minister Ashwini Vaishnaw-ten an hmanpui a ni. Kiren Rijiju chuan tower hawn thar zinga a tam zawk chu border area-a mi a ni tih sawiin, mobile connection la awm lohna hmunahte connection hi pek zel tum a ni, a ti. Border area-a cheng mipuite leh sipaite chuan inbiakpawhna atan hian Nepal SIM card an hmang ṭhin a, mahse hemi chungchangah prime minister Narendra Modi hnena a thlen hnuah thil awmdan a danglam chho ta tih a sawi. Border area-te ngaihsak niin, tunah chuan tui thianglim in tur, electricity leh kawngpuite pawh an nei chho zel a ni, a ti.

4G tower hi BSNL siam niin, he project hnuaiah hian sorkar chuan Tawang area-a hmun kilkhawr zawk, China sipaiten an luh fona hmun nia sawia awmte pawh biakpawh theih an ni tawh dawn a ni.

Rijiju chuan 4G mobile tower 254 hawn tharte chu mi 70,000 velin an chhawr thei dawn tih a sawi a, USO Fund chuan Vibrang Village programme hnuaiah 4G mobile tower siamna tur hmun 1,156 dang a thlang fel tawh bawk a ni, a ti.

4G saturation project hnuaiah, hmarchhaka 4G service pekna tur hmun 2,424 zingah hmun 270-ah optical fibre hman a ni dawn a, hmun 1,237-ah microwave leh hmun 917-ah VSAT hman a ni ang.