AP CM ban phutin darkar 36 bandh huaihawt tum

Arunachal Pradesh-a  All Nyishi Youth Association (ANYA) chuan chief minister Pema Khandu chu state tana ro a relna kawngah a hlawhchham nia sawiin, CM a nihna aṭanga bang tura phutin August 27 aṭangin Itanagar Capital Region-ah darkar 36 chhung bandh huaihawt an tum. 

CM hnena lehkha an thehluhah, ANYA chuan Pema Khandu chu hnam hrang hrangte inkara inhriatthiam lohna thlen zawnga politics khelah an puh a ni. ANYA President, Byabang Joram chuan May 29 khan CM hnenah hian state sum dinhmun dik tak leh, Trans-Arunachal Highway scam leh Arunachal Pradesh Staff Selection Board (APSSB) Job scam te chu ziaka pe turin an lo ngen tawh tih a sawi. Hei  bakah hian Covid-19 dona atana sorkarin sum a dawn leh, a hman dante pawh an dil bawk a, mahse tun thlengin Chief Minister Office (CMO) aṭangin chhanna an la dawng lo tih a sawi a ni. 

State tana hmasawnna tur project hrang hrangte chu Tawang leh West Kameng district tana dah vekah CM chu puhin, ANYA chuan Khandu chuan dictator ang maia ro rel a, mipuite harsatnate hi ngaihsak duh lo leh a, scheme leh fund-te pawh rualkhai taka sem duh lohah an puh.