Assam Governor hoin state chhung dinhmun sawiho
Assam Governor Prof Jagdish Mukhi hoin Thawhlehni khan Raj Bhavan-a an state-in tuilian a tawrh mek leh hemi kawnga sorkar hmalakna hrang hrangte an sawiho.
Meeting-ah hian additional chief secretary Water Resources, Syedin Abbasi; CEO Flood and River Erosion Management Agency of Assam (FREMAA) Siddharth Singh-te bakah senior official-te an tel.
Tuilian hian ziaawm lam a pan chho ṭan tawh a, Brahmaputra lui hi hmun hnih, Jorhat district leh Dubri district-ah hlauhawm chhinchhiahna la pel mah se, hmun dangah chuan tui a kam ṭan tawh a ni. Tuilian vanga harsatna tawk mi 4,129 chu sorkarin relief camp 26 a siamah an la khawsa mek a, tuilian hian thingtlang khaw 325 leh thlai chinna ram hectare 23,591,82-a zau a la chim mek bawk. Tuilian vanga nunna chan hi mi 110 an awm tawh a ni.
District 19-in tuilian hi an tuar a, a tuar nasa ber chu Goalpara district a ni. He district chhunga cheng mi nuai 1.05 chuan harsatna an tawk a, Morigoan district-a cheng mi 28,126 leh Baksa district-a mi 15,000 velin tuilian hi an tuar bawk. Kaziranga National Park and Tiger Reserve-a hmun 50% chu tuilian hian a la chim bawk. Park-a ramsa 150 chu tuilian vang hian an thi a, an zingah hian Park-in a hmingthan pui, samak ki khat nei chi 16 an tel.