NNPG-in Assam leh Nagaland MoU ziah tum an duh lo

Working Committee, Naga National Political Groups (NNPGs) chuan Assam leh Nagaland sorkarin ramri buaina chinfelna tur leh, oil zawn hna thawhna tura inremna, memorandum of understanding (MoU) ziah an tum chu an duh lo tih an sawi.

NNPGs chuan Nagaland chief minister Neiphiu Rio hnenah, Assam nena ramri buaina an neih meka inremna siamna tur leh, heng hmuna oil zawn hna thawhna tura inremna siampui an tumna chu sut vek turin an phut. Heng hmunte hi hmanlai aṭanga Naga ho hmun pawimawhte an ni tiin, state pahnihte hmalakna chu pawm theih a ni lo tih an sawi a ni.

Assam leh Nagaland sorkar chuan ramri leh a chhehvelah oil zawn hna thawhna tur leh, contract siam turin inbiakna neih emaw, inremna siam emaw turin thuneihna an nei lo, an ti. MoU ziah a nih chuan border area-a chengte a nghawng pawi thei dawn a ni, tiin Assam sorkar inremna ziahpui chu Naga mite dikna chanvo hralh tumnaah an ngai dawn tih an sawi.

"Hruaitute chuan boruak ṭha leh muanawm tak awm chu an duh ang anga thil an tih theihna tur chhanah ngai suh se. Ramri buai biala thil ṭha lo zawk a thleng a nih chuan a mawphurtu an ni ang," tiin NNPG chuan a sawi. State pahnih sorkarte chu border area-a buaina awm ṭhin avanga pawisawi tam tak leh police-ten nunna an lo chan tawh dangte chu theihnghilh lo tura tiin, "Inchibaina hian thisen chhuahna dang thlen suh se," tiin an vau zui bawk. Assam nena ramri chungchanga buaina an neih mekah a ram neitu dik tak chu Naga-te an ni tiin, an pi leh pu aṭanga an ram lo ni tawh venhim leh humhalhna atana hma la turin dikna an nei a ni, a ti.

State pahnihten oil zawn hna thawhna tura an tih Mon, Longleng, Mokokchung, Wokha, Niuland, Dimapur leh Peren biala mipuite aiawh roreltute chuan MoU ziah tum hi Naga mipuite thil neih ruksak tumna a ni tiin, henglai bialtu MLA-te chuan an ngaihdan chiang taka an tarlan a ṭul thu an sawi bawk.

Assam leh Nagaland sorkar hian state pahnihte ramri buaina an neihna bial chhunga oil zawn hna thawhna tur hian, kar liam ta khan a thuphungin inremna an siam tih an sawi. Nagaland CM Rio chuan a kaihhruai sorkar chuan Assam nena MoU ziah hi a remtih thu a sawi a ni.