Arunachal mi Millo Sunka-in Int'l Film Festival-ah Best Actress award dawng

Arunachal Pradesh mi Millo Sunka chuan international film festival-ah Best Leading Actress award a dawng a, an state aṭanga hetiang lawmman dawng thei hmasa ber a ni.

Lower Subansiri district-a Hapoli khaw chhuak, Sunka hi Prisma Rome International Film Awards 2023-ah short film, 'Noctural Burger'-a a chan thiam avangin chawimawina hi a dawng a ni.

'Noctural Burge' hi US-a independent film festival lian ber, Sundance Film Festival 2023-ah chhuah a ni a, Oscar-qualifying film festival- Aspen Film Festival 2023-ah pawh tihchhuah a ni bawk. He short film hi Reema Maya ziah leh direct niin, film festival hrang hrangah award pawh a lo dawng nual tawh bawk.

Sao Paulo, Brazil-a Tiete Film Festival-ah “Nocturnal Burger” hian Narrative Short Film, Best Director for a Narrative Short Film, Best Editing, Best Production Design, leh Bronze Tilapia Award for Social Awareness a dawng. Bucharest, Romania-a Short Film Factory-ah Best “Social Change” a dawng bawk.

March thlaa Prisma Rome Independent Film Awards neihah, Millo Sunka hian he film vang hian Best Leading Actress award a dawng a, heng bakah he short film hian Best Short Film, Best of the Fest, Best Director, Best Cinematography, leh Best Sound award-te dawng bawkin, US Film Festival, April 2023 leh The Norwegian Short Film Festival, June 2023-a tihchhuah tura official-a thlan chhuah zingah a tel bawk a ni.