Tripura-in tourism tihhmasawnna atan RS vbc 1,600 chuang dawng

Tripura tourism minister Sushanta Chowdhury chuan, kum nga chhunga an state tourism sector tihhmasawnna turin fund, Rs vbc 1,600 chuang state sorkarin a dawn thu a sawi.

Minister Chowdhury chuan, "Heng fund-te hi tourism sector hnuaia discipline hrang hrangah hman a ni ang. Fund hi sorkar laipui aṭangin special assistant fund ang te, Asian Development Bank leh centrally-sponsored scheme kaltlangtein dawn a ni. Inthlan hma khan tourism tihhmasawnna atan Rs vbc 1,000 hman kan lo tiam tawh a, kan tiam aia tam zawk fund kan hmu," a ti.

Agartala-a civil secretariat-a press conference a neihah, Chowdhury chuan an state-ah ram chhung leh ram pawn aṭanga khualzin lut an pung chho zel tih sawiin, "Nikum khan tourist destination hrang hrang tlawhtu khualzin 2,84,849 an awm a, heng zinga mi 35,137-te chu ram dang mi an ni. 'Swadesh Darshah-I' project hnuaiah tourist destination 11 siam mek niin, project-te thawh zawh an ni hnai tawh bawk a ni," tiin a sawi.

Mata Tripura Sundara temple chei ṭhat bakah, hmun dangah pawh facility ṭha zawk siamna tur project eng emaw zat kalpui mek a ni tih a sawi bawk.

Temple chei ṭhatna atana Rs vbc 37.8 sanction aṭangin Rs vbc 21.18 pek chhuah a ni tawh a, hna pawh 60% thawh zawh a ni tawh a ni, a ti. Gomati district-ah Matabari leh Chabimura-ah log hut 49, helipad leh ropeway-te siam mek a ni a, tourist spot tam takah adventure sports facility-te dah a ni tih a sawi bawk.