May thla aṭangin Kaziranga National Park khar dawn

Assam-a Kaziranga National Park chu May thla aṭangin khualzinte tlawh theih loh tura khar a ni dawn.

Kumtinin fur lai, May- October chhung hian park hi khar a ni ṭhin. Fur lai hian tuilianin Park hi a tibuai ṭhin hle.

May 1 aṭangin UNESCO world heritage site, KNP-ah elephant safari hi khar a ni dawn a, May 16 aṭangin jeep safari khar a ni dawn tih Eastern Assam Wildlife Divisional Forest Officer Ramesh Gogoi chuan a sawi.

Park khar a nih chhung hian park chhunga kawngpui leh lei chhiate siamṭhat hna thawh a ni ang. Upper Assam district-te leh, Arunachal Pradesh-a ruahsur nasa avangin Park-ah hian chhiatna a thleng fo a, fur laia Brahmaputra lui lian vangin park chhunga hmun 90% dawn chu tuiin a chim ṭhin a ni.

Kum 2012 khan ruahsur nasa vangin Park-ah chhiatna a thleng nasa hle. Tuilian vangin ramsa 440 chuang an thi a, an zingah hian KNP-in a hmingthan phahna, samak ki khat nei chi eng emaw zat an tel. Tuilian vang hian ramsa tam tak chuan himna zawngin, highway paltlangin Kangbi Anglong Hills lam an pan a ni.

KNP hi khawvel huapa samak ki khat nei chi awmkhawm tamna ber hmun niin, 2022 Rhino census neihah samak ki khat nei hi 2,613 an awm niin an tarlang. Hei bakah hian India ramah Royal Tiger awm tamna ber hmun a ni bawk.