AP CM-in Chakma-Hajong te 'refugee' tia a sawi vangin Chakma-ten an dem

Chakma Development Foundation of India (CDFI) chuan Arunachal Pradesh chief minister Pema Khandu chu Chakma-Hajong hnamte 'refugee' tia a sawi chungchangah an dem thu sawiin, CM chu heng hnam pahnihte huat theihna tur chawktho zawnga thu sawi lo turin an ti.

CM Khandu hian April 24-a Itanagar-a National Panchayati Raj Day puala training programme a hmanpuinaah, Assam-Arunachal Pradesh ramri buaina chinfel a nih hnuah Chakma-Hajong hnam vanga an state-in harsatna a neihte chu a chinfel tur thu a sawi. Chakma leh Hajong-te chu refugee an nih avangin an state-ah an awm nghet thei lo tih a sawi a, state hrang hrangah dah an ni dawn tih a sawi a ni.

CDFI founder, Suhas Chakma chuan CM thusawi hi chhangin, "Union of India-a thuneitute chuan Chakma leh Hajong-te, kum 1964 aṭanga North Eastern Frontier Agency (NEFA)/Arunachal Pradesh-a lo khawsa tawhte leh, he state-a piangte chu India khua leh tuiah a pawm a ni. Chakma leh Hajong-te refugee tia sawi leh, Constitution hnuaiah tribal state-a an awm ngheh phalsak an ni lo tia sawi hi thu dik lo a ni a, hetiang zawnga thu sawi hi India khua leh tuite ngei huat leh enhran theihna tur chawktho theitu a ni," a ti.