Hindu Bangladeshi nuai nga aia tam citizenship pek chuan Politics ka bansan nghal ang : Assam minister

Assam state finance, health and PWD minister Himanta Biswa Sarma chuan Citizenship (Amendment) Act (CAA) hman avanga India khua leh tui nihna pek, Hindu Bangladeshi nuai nga aia tam an tlin  chuan politics a bansan tur thu a sawi. 

CAA hman a nih chuan Bangladesh aṭanga lut, Hindu te nasa takin an pung dawn nia sawi chungchang chhangin, khua leh tui pek hi mi nuai nga aia pakhat leka an tam a nih pawhin politics a khel chhunzawm tawh lo ang tiin Sarma chuan a sawi a ni.

Sarma chuan Congress hruaitute chu cho let nghalin CAA chhawrtu, Hindu Bang­la­deshi chu vaibelchhe khat an tlin a nih chuan anni pawh politics chawlhsan turin a ti bawk. Assam minister chuan Hindu Bangladeshi nuai nga chuan Assam dinhmun a tiderthawng pha dawn lo tih sawiin, "Hindu Bangladeshi hi Assam chief minister an ni ngai lo ang," a ti. 

"Parliament-a CAA pass a nih hma khan, union home minister Amit Shah chuan pawl hrang hrangte pawh meeting a neihpui a, an zingah hian All Assam Students' Union pawh an tel a ni. He meeting-ah hian Shah chuan Assam-ah Bangladeshi nuai 70 an awm thu leh, an zingah Hindu nuai nga an tel thu a sawi a ni. Bangladesh aṭanga lut dangte pawh National Register of Citizens (NRC) hmangin hriatchhuah a ni dawn tih a sawi bawk. Shah chuan AASU hnenah CAA kaltlang hian Hindu Bangladeshi te chu pawm turin a ngen a, mahse zirlai pawl hian he rawtna hi an pawm duh lo a ni," tiin Sarma chuan a sawi. 

Sorkar laipui chuan CAA kalpui dan tur hi a duang thuai dawn a, Assam-ah chuan Hindu Bangladeshi-te chu citizenship dil turin thla thum aṭanga thla ruk vel hun pek an ni ang, tiin Sarma chuan a sawi bawk.