HC-in AP BJP MLA Dasanglu Pul thlan tlin a nihna hnawl

Gauhati High Court Itanagar bench chuan BJP MLA Dasanglu Pul chu election affidavit a thehluhah, a thil neih zatte a thup ṭhen avangin Representation of People Act (RPA) hnuaiah MLA candidate a nihna chu pawm a ni lo a, MLA atana thlan tlin a nihna pawh hnawl a ni tih Thawhlehni khan a sawi.

Chief minister hlui Kalikho Pul nupui pathumna, kum 45 mi Pul-i hi kum 2019 khan a pasal thih avangin a bial hluiah by-election neihnaah dingin, thlan tlin a ni.

Hemi ṭuma Dasanglu Pul nena Hyauliang biala inkhing, Congress candidate Lupalum Kri chuan petition thehlutin, Pul hian inthlan dawna a thil neih tarlanna affidavit a thehluhah, Mumbai-a a pasal hminga hmun pali an neih leh, Arunachal Pradesh-a hmun an neihna pahnihte a tarlang tel lo tih a sawi. Dik lo taka thil a tih avangin MLA atana thlan tlin a nihna hi pawm theih a ni lo, a ti.

Kri chuan Pul-in affidavit thehluha a thil ziahte a dik tawk lo tih complaint an thehlut chungin, hetih laia returning officer chuan a lo pawmsak tho tih a sawi bawk.

High Court chuan BJP candidate hian a nomination paper a thehluhnaah Representation of the People Act, 1951-a Section 33 a zawm lo tih sawiin, hei vang hian RPA Sectin 36(2)(a) hnuaiah a nomination paper hi hnawlsak a ni tur a ni, a ti. Dik lo taka Dasanglu Pul nomination paper pawmsak hian inthlan result pawh a nghawng tel a ni tiin, Pul chu MLA a pawm a ni lo tih a sawi.

Mahse Court chuan a thutlukna siam chungchangah Pul hian petition a thehlut ve thei tih a sawi nghal bawk. BJP MLA hian High Court-ah petition hi thehluh ve leh nghal a tum.