Meghalaya-in Umiam lake-ah Northeast Regatta buatsaih dawn

Meghalaya Tourism department chuan Umiam Sailing Club nena thawkdunin, April 29 - May 2 inkar hian Umiam Watersports Complex-ah Northeast Regatta an buatsaih dawn.

Ni nga awh tur, Northeast Regatta hi waters sports chawilarna kawng khat atan te, khualzin hip luhna tur leh, world sailing map-a an lan ve theihna tur te, ṭhalaite tan hna thawh tur siamna remchang siamsakna atante buatsaih tum a ni tih an sawi. Workshop neih turah pawh ṭhalaite tel turin an sawm nghal bawk.

Northeast Regatta-ah hian India ram chhunga state 10 chuang aṭangin participant 80 vel an awm dawn a, an zingah hian club 12 an tel bawk. Indian Army leh Naval service bakah, India rama sailing NGO hmasa ber leh awmchhun Uday Foundation team pawh an tel ang.

Boat race, muscial and cultural event, nature excursion, food and flea market, tour package, paintball, camping spot leh river cruise boat-te buatsaih a ni ang. Club, team leh mimal a duh apiang tan tel theih a ni.

April 29 leh 30 hian concert buatsaihin, tualchhung artist-te bakah national leh international artist an tel ang. K-pot artiste Kim Woojin leh Delhi-based Twing Strings pawh inlan tur zingah hian an tel.