MPLAD fund tichingpena puhin Assam MP lakah FIR thehlut

Assam MP Ajit Bhuyan leh official 13-te chu Members of Parliament Local Area Development (MPLAD) fund tichingpena puhin, an lakah FIR thehluh a ni.

FIR hi Chief Minister Vigilance Cell-in special judge court-ah a thehlut a ni. Sum tichingpena puh zingah hian high-ranking official ACS Sharmistha Bora leh Hemanta Dutta te an tel. March thla khan fund tihchingpen kaihhnawihah hian ACS officer pali chu suspend an lo ni tawh bawk.

FIR thehluhah hian Barpeta kawng siamna atana MPLAD fund hman danah thil dik tawk lo a awm tih tarlan a ni a, hna thawh hi 75% pawh zawhfel a nih hmain bill pekchhuah a ni tih an sawi.

Fund tihchingpen chungchang chu CM Special Vigilance cell in a chhui hnuah hriatchhuah a ni a, bill-a hming lo sign-tu officer pali-te chu suspend an ni.

Rajya Sabha MP hian MPLAD fund aṭangin Barpeta-a kawng pathum siamna turin Rs nuai 28 a pe a, mahse kawngte hi siam tak tak ni loin, bill lem hmangin sum hi lakchhuah a ni.