Manipur Governor-in international border town tlawh

Manipur governor Anusuiya Uikey chuan Myanmar ramri bul, Tengoupal district-a international border town More khua a tlawh a, integrated check post (ICP)-te endikin, tualchhung mite leh CSO aiawhte a kawm.

Governor Uikey hian Moreh khua a tlawh ṭum khatna a ni. Kum 2021, March 11-a Moreh international border kaltlanga India-Myanmar inkalpawhna kawngpuite khar a nih avanga tualchhung miten insumdawn tawnna lama harsatna an tawh dante a ngaihthlaksak a, Chief Minister hnenah an harsatna sutkiansak dan ngaihtuaha hma lak sak tura a ngen tur thu a sawi.

Governor hi tribal affairs & hills minister Letpao Haokip, Tengnoupal district commissioner Ymanam Ranjan bakah Tengnoupal SP, forest officer, Assam Rifles officer, BrTF commanding officer leh civil society organisation eng emaw zat member-ten an ṭawiawm a ni.