Nagaland sorkarin Munipical Act thar siam turin panel din dawn

Nagaland sorkar chuan Nagaland Municipal Act (NMA) of 2001 ṭhiat a, Urban Local Body (ULB) inthlan neih tur a sut hnuah, Ningani khan Municipal Act thar siam turin panel a din dawn tih a sawi.

Power and parliamentary affairs minister, KG Kenye chuan NMA 2001 chu sawisel leh inhnialna tam tak siamtu a ni a, Naga tana special status pekna Article 371-A nena inkalh nia sawina te a awm bawk a, hei vang hian state sorkar chuan a ennawn hnuah a ṭhiah ta tih a sawi.

Municipal Act thar duang tur hian committee din a ni dawn a, anni hian mi hrang hrang kawm kualin, Naga-te nunphung leh khawtlang nun nena inmil turin dan thar hi an duang dawn tih minister chuan a sawi. State legislature chuan a rang thei anga Act thar hi siam a tum a ni, a ti.

ULB inthlan neih tura hmeichhiate tana seat 33% dah tura tih chu tribal pawl leh NGO hrang hrangten an duh lo a, NMA 2001 chu an sawisel bawk avangin state sorkar chuan NMA hi ṭhiatin, inthlan neih tur hi a ṭhulh a ni.

Supreme Court chuan civic body inthlan hi buatsaih turin hriattir mah se, state sorkar chuan Municipal Act ṭhiah a nih avangin inthlan hi buatsaih theih a ni rih lo tih a sawi thung.