Arunachal : SIFF-in Siang River-a 10,000MW dam project siam tum duh lo

Arunachal Pradesh-a Siang Indigenous Farmers' Forum (SIFF) chuan Siang River-a 10,000 MW dam project siam tumna chu Siang distrirct-a Adi hnam chuan a pawm dawn lo tih a sawi.

Ningania Itangar-a press conference an neihah, SIFF hruaitu Bhanu Tatak chuan dam siam hian Siang lui kama cheng, Adi hnamte chenna bial leh khuate a chim vek dawn vangin hun rei tawk tak aṭangin he project siam tumna hi an lo dodal tawh a ni, a ti.

Forum chuan Arunachal Pradesh chief minister Pema Khandu leh power minister RK Singh-ten an state-a GW hydropower 13 thawhna tura memorandum of understanding (MoU) an ziak chu an dem thu an sawi bawk. Renewable project, solar leh wind energy-te chawilar a nih chhoh laia, Arunachal Pradesh sorkarin non-renewable project, hydropower project lian tham tak tak siam a tum chu an hriatthiam loh thu an sawi. Adi hnam dinhmun leh an hmalam hun tur ngaihtuahin, Siang River-a mega project siamna tura MoU an ziah tawh pawh sut leh turin state leh sorkar laipui chu an ngen bawk a ni.

Dam project-in a nghawng tur loneitute leh SIFF-ten dodalna an lantir chungin, National Hydro Power Corporation (NHPC)-in tihluihna hmangin survey an nei a, SIFF member-te chu district thuneitute chuan sipai leh paramilitary force-te koh luhahte an vau niin Bhanu Tatak chuan a sawi.

SIFF hian kum 2014 khan dam project siam chungchangah Gauhati High Court Itanagar permanent bench-ah PIL an lo thehlut tawh a ni. Court chuan state sorkar hnenah, dam project siam dawnin a nghawng tur tualchhung mite be rawn a, an remtihna la zel turin a lo ti tawh. Mahse thuneitute chuan High Court thupek hi an zawm ngai lo tih Tatak chuan a tarlang.