Meghalaya : KSU-in BSF camp ṭhiah an phut

Meghalaya-a Khasi Students' Union (KSU) chuan Ningnai khan deputy chief minister in-charge (Home) Prestone Tynsong hmuin, Amlarem khuaa BSF camp ṭhiat turin an ngen.

KSU West Jaintia Hills district unit president Laitphar Syngkrem chuan, "Amlarem khuaah dan loin BSF mi leh sate hi an awm a, an awmna hmun hi ṭhiat turin Deputy Chief Minister hi kan ngen a ni," a ti. BSF mi leh sate chuan tualchhung mite an tithlabar fo a, an thil neite pawh an laksak ṭhin tih sawiin, dan loa tualchhung mite an lo endik ṭhin chu an dem tih a sawi bawk.

Syngkrem chuan, BSF chu international border vengtu tur an ni a, hetih lai hian international border aṭanga hla tak, Amlarem khuaa dah an ni hi a dik lo tih a sawi. Amlarem-ah hian BSF hi thla ruk an awm tawh a ni. BSF-te chetdan chungchang hi deputy commissioner leh SDO hnenah pawh an thlen tawh a, mahse action lak a nih loh avangin zirlai pawl hian Deputy CM hnenah hian an thlen zui ta a ni.

Deputy CM Tynsong chuan zirlai pawlte ngenna hi lo ngaihven zui turin deputy commisioner a hriattir a, mahse sorkarin hma a lak zui thuai loh chuan a ṭul angin zirlai pawl chu an che chhuak ve mai dawn tih Syngkrem chuan a sawi.