Manipur: Mipui lungawi lote'n forest dept building hal

Manipur sorkarin reserved forest area-a chengte hnawhchhuah a tumna chu tribal-ten dodalin, lungawi lohna an lantirna kal zelah Churachandpur district-a forest department building chu Zirtawpni liam ta zan khan hal a ni.

Forest dept building kang hi kangṭhelhtuten rang takin ṭhelh mah se, official document tam tak a kang chhe hman a, bungrua nuai tam tak hu a chhe bawk.

Churachandpur district-ah hian a hma pawhin buaina a lo chhuak tawh bawk. Forest dept building hal a nih hma, Ningani khan chief minister N Biren Singh-a hun hmanna tur gymp chu mipuiten beiin, chair 100 vel leh hmanraw dang awmte an hal. He buaina thleng vang hian CM pawhin a hun hman tur hi a ṭhulh phah a ni.

Zirtawpni vek khan lungawi lohna lantirtute leh police-te innawr buaiin, police-te hian mipui hnawh darh nan tear gas leh rubber bullet-te an hmang.

Pawikhawihna thlenga bultumtu ber hi Indigenous Tribal Leaders' Forum-te nia sawi a ni a, anni hian Manipur-a BJP sorkarin reserved leh protected forest area leh wetlands survey neih a tum chu an dodal a, sorkar hmalakna duh lohna lantirin rally-te an huaihawt bawk. Tribal tamna, Kangpokpi leh Tengnoupal district-ah chuan buaina eng emaw zat a chhuak tawh tih police-te chuan an sawi.

Buaina chhuak vang hian Churachandpur district-ah Inrinni aṭang khan zan lam curfew puan a ni a, curfew hian tlai dar 5 aṭanga a tuk zing dar 5 thleng a huam. Hei bakah hian CrPC section 144 hnuaiah mi panga aia tam punkhawm khap a ni a, internet service tihtawp a ni bawk.

Kuki Students' Organisation chuan Forum an thlawp thu sawiin, tribal-te dikna chanvo ngai pawimawh loa dan loa an awmna aṭanga chhuahtir an ni leh, sakhaw hmun tihchhiat a ni te chu an dem thu an sawi. April thla tir lam khan Manipur sorkar chuan Kristian biak-in pathum chu dan loa sak nia sawiin a lo ṭhiahsak tawh bawk a ni.

Congress party chuan tualchhung buaina thlengah rorellai, BJP chu mawhphurtuah puhin, ram leilung fate dikna chanvo palzut sakah an puh. BJP rorelna hnuaiah Manipur dinhmun chu a tha lo hle tih sawiin, dan leh thupek te chu a tluchhe tawh tiin, central leh state-a BJP sorkar chu an dem thu an sawi. Chief minister hlui Okram Ibobi Singh leh state Congress chief K Meghachandra Singh-te chuan 'tribal leh forest lands' chungchangah BJP sorkar chu policy dik lo kalpuiah an puh.