Manipur: NIA-in Naga hruaitu thattu mi 8 'wanted' ah puang

National Investigation Agency (NIA), Imphal branch chuan Naga hruaitu, Athuan Abonmai rukbo leh thahnaa inhnamhnawiha puh mi pariatte chu 'wanted'-ah puangin, an pariat hian an lu manah Rs nuai 2 ṭheuh a phal.

Zeliangrong Baudi (Assam, Manipur, and Nagaland) advisor leh president hlui, Athuan Abonmai hi kum 2021, September 22 khan an khua, Tarung aṭangin Tamenglong-a Polo Ground-a community outreach programme hmang turin a kal a, mahse Tamenglong headquartes-ah NSCN(IM) helpawl mi 20 velin an rubo a ni. Police-te chuan Abonmai hi zawng nghal mah se an hmu zo lo a, rukbo a nih tlaiah vek hian Nagaland leh Assam ramri, Tamenglong district-a Tamei sub-division hnuaia Pallong khuaah hmuh niin, a taksaah silaia kahna hnu eng emaw zat hmuh a ni.

Abonmai rukbo leh thah a nih dan hi state police-ten an chhui hnuah, union home ministry chuan NIA hian he case hi lachhawng turin a ti a, NIA Imphal Branch chuan Lamphel police station-ah FIR ziak lutin a chhuizui ta a ni. NIA-in FIR an ziahluh hma hian, Abonmai-a fapa, Aran Abonmai chuan Lamphei police station-ah hian a pa rukbo a nih hlimah FIR a lo thehlut nghal bawk a ni.

NIA-in Abonmai thahna kaihhnawiha wanted-a a puante hi Khamkhuanang, Athuana Pamei, Withonbou, Chunkimlung Thaimei, Keiduampou Panmei, Pousabou alias Jackson, NK Widingambou leh Achuna Panmei-te an ni a, an vai hian Tamenglong district mi vek an ni. NIA chuan an thlalakte pawh a tarchhuak nghal bawk. Heng mi pariatte hi Unlawful Activities (Prevention) Act leh Indian Penal Code (IPC)-a section eng emaw zat hnuaiah hrem theih an ni ang.