Assam Gas leh OIL in inremna an ziak

Assam Gas Company Limited (AGCL) leh Oil India Limited (OIL) chuan Assam leh Tripura-a pipe natural gas pekna tura thawhdunna tur, joint venture (JV) private limited company kalpuina an ziak.

JV company-ah hian Assam sorkar hnuaia AGCL hian share 51% neiin, OIL hian 49% a nei dawn a ni. Local natural gas grid siamin, Assam-a Lakhimpur, Dhemaji, Darrang, Udalguri, Sonitpur leh Biswanath Chariali-a domestic leh commercial establishment bakah, Tripura district ṭhenkhatah piped natural gas an pe dawn a, compressed natural gas (CNC) station eng emaw zat an siam bawk ang.

Inremna hi Guwahati-a Janata Bhawan-ah ziakin, Assam chief minister Himanta Biswa Sarma pawhin a telpui a ni. CM Sarma chuan AGCL leh OIL-te thawhdunna hian an state-a industrial development thawh mekah pawh nasa takin a pui thei dawn a ni, a ti. Hun rei tak aṭanga an state economy hmasawnna tura hma laknaah OIL in a puih ṭhinaah lawmthu a sawi bawk.

Inremna ziahnaah hian Assam industries minister Bimal Bora, public health engineering deparment minister Jayanta Malla Baruah, AGCL chairman Bolin Chetia leh OIL chairman leh managing director Ranjit Rath-te bakah official dang emaw zat an tel bawk a ni.

Kum 2018, May thla khan Assam leh Tripura-a district pasarih chu Petroleum and Natural Gas Regulatory Board (PNGRB)-in hmun City Gas Distribution (CGD) network kalpuina tur hmun 86 a puan zingah a tel. Assam-ah chuan Kamrup (Metro) leh Brahmaputra Valley-a Kamrup bakah, district dang pathum - Cachar, Hailankandi leh Barak Valley-a Karimganj an tel. Tripura-ah chuan West Triprua leh Gomati district an tel bawk.