Zu in nasat vangin Assam police 300-te VRS hmangin chawlh tir dawn

Assam chief minister Himanta Biswa Sarma chuan Assam Police officer leh jawan 300 vel chu zu an in nasat avangin voluntary retirement scheme hmanga chawlh tir tum an nih thu a sawi.

VRS hmanga officer tam tham tak chawlh tir tumna hi buaipui ṭan a ni tawh, anmahni thlaktu tur pawh lak an ni dawn tih CM chuan a sawi bawk.

CM chuan, "Police officer leh jawan 300 vel chu zu in reng chi an ni a, an zu chuan an taksa thlengin a tichhe tawh a ni," tiin home ministry changtu ni bawk Sarma chuan a sawi. Police zu in nasa te voluntary-a chawlhtir an nihna tur hi dan thar a ni hran lo a, a hmain an la hmang lo mai zawk tih a sawi.

Assam police officer eng emaw zat chu an duty laia zu an ruih buai vang te, ṭawngkam mawi lo tak tak an hman ṭhin vang leh, an senior-te thlenga zah lo taka an tih ṭhin avangtein supsend an lo ni tawh ṭhin a ni.

Police-te tana phycial fitness a pawimawh thu CM chuan sawi bawkin, officer zingah zu in nasa, thau lutuk leh eiruk thubuai neite chu VRS hmanga chawlhtir an ni zel ang, a ti.