AP aṭanga Gujarat-a sai thawn chungchangah petition thehlut

Arunachal Pradesh aṭanga Gujarat-a sai 20 thawn an nih chungchanga Supreme Court-a petition thehluh chu May 12 hian ngaihtuah a ni dawn.

PIL hi advocate Abhir Phukan-a thehluh niin, Arunachal Pradesh leh Tripura aṭangin sai 20 aia tlem lo chu Jamnagar, Gujarat-a Radha Krishna Temple Elephant Trust hnenah thawn a ni, a ti. Hmarchhak state aṭanga Gujarat-a sai thawnte hi kawngpuiah km 3,400 chuang tlanpui niin, an kalkawngah sik leh sa inthlak an tawng a, hun rei tak zinkawng harsa tak zawhpui an nih avangin an hriselna leh an himna thlengin a ngawng a ni, a ti.

"Saite hian mininal sweat gland an neih tet avangin an thermoregulatory system a chak lo hle. An taksa lumna, body temperature hi 37 degree Celsius niin, an comfort zone chu 25-26 degere Celsius a ni. Sai 20 phurtu motor-te hian an kalkawngah khaw lum tak, 40-45 degree Celsius-te an paltlang thla ṭhin a ni. Hetianga sawn an nih dan hi uluk zawka enzui an ngai a ni," tiin petition-ah hian Phukan chuan a tarlang.

Centre for Research on Animal Rights (CRAR) chuan 49-vehicle caravan hmanga sai 20, km 3000 chuanga thui tlanpui a, Arunachal Pradesh aṭanga Gujarat thlenga phurh an ni chu a lo sawisel tawh bawk.

Wildlife organisation hrang hrangten dodalna an lantir chungin, heng sai 20-te hi AP-a Namsai district aṭangin Gujarat-ah hian phurh an ni. Supreme Court-in a ruat, High-Powered Committee (HPC) chuan Radha Krishna Temple Elephant Trust hnena sai thawnna tur hian phalna a pe a ni.

Supreme Court-a petition thehluh a nih hnuah, chief justice of India (CJI) justice DY Chandrachud leh justice JB Paridwala awmna bench chuan, ministry of environment and forest hnenah, AP aṭanga Gujarat-a sai phurh thlak an nih chhan pawh a zawt a ni.