Union Minister-in hmarchhaka JJM, SBM-G hmasawn dan thlirlet

Union minister of Jal Shakti, Gajendra Singh Shekhawat chuan Thawhṭanni khan Radisson Blue Hotel, Guwahati-ah hmarchhak biala Jal Jeevan Mission (JJM) leh Swachh Bharat Mission Grameen (SBM-G) kalpui leh hmasawn dan thlirletna hun a hmang.

Meeting-ah hian Shekhawat chuan hmarchhak bial state hrang hranga JJM dinhmunte thlirin, he scheme kalpui a nih dan te, panchayat kuta hlan a nih dante an sawiho. Hei bakah hian SBM-G hnuaia thingtlang khaw hrang hranga ODP (open defecation free) plus scheme leh waste management dinhmunte pawh sawiho a ni bawk.

Hmarchhak state-ten Jal Jeevan Mission policy-te ṭha taka an kalpui chu fakin, Union Minister chuan "Assam-ah chuan Jal Jeevan Mission hnuaiah hmasawnna chu a tira 1% kha 50% a tling chho tawh a ni," a ti. Kum 2024 kumtawpah hmarchhak state-te chu JJM hnuaia hmasawnna chu 100% a tling theihna turin chak taka hma la zel turin a chah. JJM chak zawka kalpui a nih theihnan Assam-a JalDoot Programme siam tan brochure, operational guidelines leh JalDoot Diary-te a tlangzarh bawk a ni.

JalDoot Programme hi Assam-a JJM hmalakna dangdai tak niin, zirlaite chu rural area-a chengte hnena tuithianghlim leh a enkawlna pawimawhzia zirtir tura fuih an ni. He programme hmang hian Class VIII - XII zirlaite chu tui sawngbawl leh faina lam kawngte zirtir an nih bakah, water pipeline chungchangah training pek tum an ni bawk.