Myanmar aṭanga dan loa lut an pung nasa State dang aṭanga lut turten ILP an neih ngei a ngai - Manipur CM

Manipur chief minister N Biren Singh chuan Myanmar aṭanga dan loa an state-a lut an pung nasa hle tih a sawi a, tun hnaiah Imphal Airport-ah Myanmar mi pasarih man a nih thu a sawi. An mi man zinga pangate chuan Mizorama siam, Adhaar card an neih thu a sawi bawk.

Thawhlehni khan CM Singh hian state secretariat-a Inner Line Permit (ILP) system tana facial recognition system (FRS) dah thar a hawng a, hemi hnua chanchinthar lakhawmtute a kawmnaah, tun hnaia Mizo Zirlai Pawl (MZP)-in Mizoram aṭanga lutte hnen aṭanga Inner Line Permit (ILP) phut lo tura an phutna chu chhangin, hei hi an pawm lo tih a sawi bawk.

Chief Minister chuan ILP chu sorkar laipuiin ram leilung fate humhalhna tura a pek a ni tiin, an state-ah hian Mizoram aṭanga document nei, Myanmar mi tam tak man an ni tawh tih a sawi."Dan loa Myanmar mi, Manipur-a lut mi 410 man an ni tawh a, hetih lai hian Myanmar tualchhung buaina avanga tlanchhia, border area-a detention home-a awm hi mi 2,400 vel an awm bawk," a ti. Heng mite bakah hian dan loa Manipur-a khawsa, Myanmar mi tam tak an la awm ngei pawh a rinawm thu a sawi. Border area-a chengte hnenah dan loa an state-a lutte venna tur leh, a lut a te pawh felfai taka record a nih theihnan sorkar thawhpui ṭha turin a ngen. Dan loa lutte dapchhuah an nih theihna tur hian sorkar chaun Imphal airport bakah, Indo-Myanmar borer town Moreh leh Behiang te, Khongsang railway station-ahte facial recognition system camera dah a tum thu a sawi bawk.

Tunhnaia MZP in Mizoram aṭanga Manipur-a lutte hnen aṭanga ILP phut lo tur leh, an state-a Zo hnahthlak awmte tana him lo zawnga sorkarin hma a lak chhunzawm zel avanga Mizorama Manipur Meitei hnamte chunga thil thleng a awm palh pawhin an mawhpuh thei lo ang ti zawnga thuchhuah an siam chu a dem thu CM chuan a sawi bawk. "Mizorama pawl aṭanga hetiang thuchhuah a awm hi a vanduaithlak hle a ni. Heti zawnga thuchhuah siam hi chibing inkarah boruak ṭha lo zawngin a inher thei a ni," a ti.

CM Singh chuan dan leh thupek kenkawh chungchang chu state chhung thil a ni a, pawn lam mite inrawlhna tur a ni lo tih a sawi. Eng mi pawh, state dang aṭanga Manipur lut turte chuan ILP an neih ngei a ngai tiin, endik zel a nih tur thu a sawi bawk.

NESO-in Zo hnahthlak leh Khasi hnam chunga thil thleng dem

Hmarchhak biala zirlai pawl lian ber, Northeast Students' Organisation (NESO) chuan tun hnaia Manipur sorkarin an state-a hun rei tak lo inbengbel tawh, Zo hnahthlak leh Khasi hnam awmte an awmna hmun aṭanga a hnawhchhuah chu an dem thu a sawi.

Manipur sorkarin an state-a reserved forest area-a chengte hnawhchhuah hna a kalpuinaah, kum tam tak lo khawsa tawh Zo hnahthlak leh Khasi hnam eng emaw zat chu an awmna hmun aṭangin hnawhchhuah an ni.

NESO chuan Manipur sorkar thiltih hian hmarchhak bial leilung fate thlengin a nghawng tih sawiin,an pi leh pute aṭanga an lo khawsak tawhna hmun aṭangin hnawhchhuah an ni a, heng mite dan loa ram dang aṭanga pem lut pawh an ni lo tih an sawi.

NESO chuan an hnuaia zirlai pawl pahnih, All Manipur Students' Union (AMSU) leh Mizo Zirlai Pawl (MZP) chu Zo hnahthlakte hnawhchhuah an nih chungchanga boruak ṭha lo awm mek siamṭha tur leh, chibing inkara buaina chhuak tur veng tura hma la leh thawkdun turin a ngen bawk.