Tripura-in Rs vbc 312.38 hu MoU 8 ziak

Tripura sorkar chuan Thawhlehni khan an state tihhmasawnna tura thawhdunna, cheng vaibelchhe 312.38 hu Memorandum of Understanding (MoU) pariat chu investor hrang hrangte a ziahpui.

MoU ziah zingah hian tribal district, Dhalai-a public private partnership (PPP) model hmanga medical college, Rs vbc 247 senga siamna tur pawh a tel.

Tripura hian medical college pahnih a nei mek a, pakhat chu sorkar hnuaia mi Agartala Govt Medical College (AGMC) niin, pakhat chu society din Tripura Medical College (TMC) a ni. Hei bakah hian dental college pakhat a awm bawk.

Agartala-a 'Tripura Roundtable on Investment Opportunities' buatsaihah, chief minister Manik Saha chuan hmasawn tur chuan inkalpawhna, connectivity a pawimawh tih sawiin, an state chuan railway, national highway leh airway connectivity lamah hmasawnna nasa tak an neih thu a sawi. Inkalpawhna lam a ṭhat chhoh zel vangin, investor-te pawhin an state-a industry din chhohte an chak tawh tih sawiin, investment ti duh pawh an pun chhoh zel thu a sawi.