Manipur : District 8-ah zan lam curfew puang, internet tihtawp a ni

Manipur-a Meitei hnam Scheduled Tribe (ST) caterogy-a dah tum duh lohna lantir a, tribal pawl hrang hrangin 'Tribal Solidarity March' an buatsaih ṭuma tribal leh non-tribal te inkara buaina chhuak vangin, Manipur sorkar chuan hill district pariatah mi panga aia tam punkhawm khap thupek tichhuakin zan lam curfew a puang a, ni nga chhung atan state pumah internet service a titawp bawk.

All Tribal Students Union of Manipur (ATSUM) bultumin, Nilaini khan Meitei-te ST status pek tum duh lohna lantirin hill district 10-ah kawng zawh a ni. District headquarters ṭheuhah kawng hi zawh niin, he huna tel tur hian khaw hrang hrang aṭangin an kalkhawm a ni.

Manipur-a cheng zinga 53% hi Meitei an ni a, an state dan hman mekah hill area-ah an inbenbel ve phalsak an ni lo. Meitei hnam hi Imphal Valley-ah khawsa berin an state ram 10% vel an luah a, mahse dan loa Bangladesh leh Myanmar aṭanga lut tam takin an chimbuai tawh avangin harsatna hrang hrang an tawk chho tawh niin an sawi.

Manipur khawpui lian pahnihna, Churanchandpur-ah chuan tribal-te chenna hmun reserved forest area-a puan a nih avanga he hmuna chengte hnawhchhuah duh lohna lantirin nawrh huaihawt a nih vangin, kar liam ta khan punkhawm khapna thupek tihchhuah a ni. Mahse Nilainia kawngzawhna buatsaihah hian mi tam tak chhuak khawmin, Torbung area-ah tribal leh non-tribal inkarah buaina nasa tak a chhuak a, chenna in te hal a ni. Pungkhawmte hnawhdarh nan hian police-te chuan tear gas-te an hmang. District danga kawngzawhnaah pawh buaina a chhuak bawk. Imphal khawpuiah tribal chenna in eng emaw zat beih a ni a, Bishnupur, Kangkokpi leh Moreh-ahte in halsak leh suasam sakte an awm bawk.

Buaina chhuak vang hian sorkar chuan non-tribal tamna Imphal West, Kakching, Thoubal, Jiribam leh Bishnupur district leh, tribal tamna Churachandpur, Kangkokpi leh Tengoupal district-ahte curfew hi a puang a ni.

Hetih lai hian Valley district-ah Meitei-te ST status pek phutna lantirin kawngpuite dan a ni ve bawk a, ST status pek ngei an phut thu leh, an state-a reserved forest area humhalh an phutna thute an aupui. ST category-a Meitei dah an nih theihna tura hma la tu, Scheduled Tribe Demand Committee Manipur (STDCM) chuan sokar hna leh education institution-a an chanpual dahsak leh chhiah chungchanga ngaihnathiamna an duh vang ringawta he thil hi phut an ni lo tih an sawi. "Myanmar, Bangladesh leh state dang aṭanga dan loa pem lut pung zelte laka Meitei ram, culture leh identity humhalh leh venhimna tur atana tih a ni," an ti.

Manipur-ah hian tribal te hill area-ah chengin, an ram 90% vel an luah. Tribal tam zawk hi Kristian sakhaw zuitu an ni a , an state mipui 40% vel an tling a ni.