Amit Shah leh CM Singh inbia

Manipur-a tualchhung buaina chhuak vang hian nimin khan union home minister Amit Shah chuan Manipur chief minister N Biren Singh a bia a, state chhung dinhmunte a zawtfiah.

Sorkar laipui chuan Manipur dinhmun chu a thlithlai reng tih a sawi a, buaina chhuahna bialah dan leh thupek kengkawh turin Rapid Action Force (RAF) team a tir nghal bawk. Indian Army leh Assam Rifles sipaite pawh tirh luh an lo ni tawh bawk a ni.

Official-te chuan RAF company panga chuan thlawhtheihna hmangin Imphal an pan a, company dang 15 pawh a ṭul huna kal thei tura inring tura hrilh an ni tawh bawk tih an sawi.

Buaina chhuahna hmuna cheng mi 4,000 vel chu sipaiten chhanchhuakin, hmun him lamah awmtir an ni tih defence thupuangtu chuan a sawi a, midang pawh hruai chhuah belh zel an la nih thu a sawi bawk. Buaina chhuak a punlun zel lohna turin Army leh Assam Rifles-te chuan state police-te puiin, zan lamah pawh an duty a ni.

Chief Minister chuan state mipuite chu buaina siam lo tura ngenin, an awmna bial ṭheuhah boruak muanawm a awmna tura hma la turin a ngen. An state buaina chhuak chu pawl pahnihte an inhriatthiam lohna vang a ni tiin, hnam hrang hrangte harsatna neihte pawh an hnam aiawhte nena inbiain chinfel dan zawn zel tum a ni, a ti. Mipuite chu thu lengvak awih mai lo turin a chah bawk. Buaina chawk chhuaktu, mimal leh pawl laka na taka action la turin security force-te chu hriattir an ni, a ti.