UPSC-in AP sorkar ngenna a hnawl

Arunachal Pradesh sorkarin Group A leh B post lakna tur exam buatsaih a dilna chu Union Public Service Commission (UPSC) chuan a hnawlsak.

State hian Arunachal Pradesh Public Service Commission (APPSC) siamṭhat a nih hma chu an state-a Group A leh B post ruak awm chu state recruitment-related policy hmanga lak a dil a ni. Mahse he ngenna hi UPSC chuan chhangin, state chhunga public service commission a function reng laiin hetianga an lo lak hi a theih loh tih a hrilh.

APPSC-in assistant engineer (Civil) exam a buatsaiha question paper leak kaihhnawihah, APPSC chairman Nipo Nabam bakah member dang pakhat tih loh chu an bang vek a ni. Mahse UPSC chuan APPSC-ah hian member pakhat a la awm reng avangin a la function tho a ni, a ti.

UPSC in exam buatsaih a phalsak loh avangin, sorkar chuan APPSC chairman leh member pathum lakna tur advertisement a tichhuak ve nghal bawk.

Question paper leak chungchang hi state police leh special investigation cell-ten an chhui hnuah, AP sorkar chuan nikum October thla khan CBI kutah a hlan a ni. Dik lo taka thiltihnaah hian thawktu 41 vel an inhnamhnawih nia sawi a ni a, an zinga 19-te chu an hna aṭanga ban niin, mi 22 laka disciplinary action lak a ni tawh bawk.