NIA-in Manipur leh Nagaland-a hmun panga dap

National Investigation Agency (NIA) chuan Thawh­lehni khan Naga helpawl, National Socialist Council of Nagaland, Isak-Muivah (NSCN-IM) hnena ṭanpuina sum pek ṭhin kaihhnawihah Manipur leh Nagaland-a hmun panga an dap. 

NIA-in hmun an dap hi Imphal, Manipur leh Dima­pur, Nagaland amite an ni. Heng hmunte hi NSCN(IM) Steering Committee mem­ber, Pungting Shimrang (James Jamir) nupui, Alemla Jamir laina hnaite in a ni. An in dap aṭang hian NIA chuan pawisa fai cheng nuai 82.5, ram nei­tu nihna document pawi­mawh, diary, thlalak, smart phone 15, hard disk pakhat, pen drive pakhat, memory card pakhat leh laptop pali an man. 

Alemla hi NSCN(IM) tana thawka puh a ni a, nikum December 18 khan Delhi airport ah man niin, a kut aṭangin pawisa fai cheng nuai 72 man tel a ni bawk. December 20 khan NIA chuan Unlawful (Activities) Prevention Act hnuaiah Alemla hi helpawl hnena sum pe ṭhina puhin thubuai an ziaklut a ni. Kumin January 10 khan NIA special court chuan Alemla judicial custody hi thla khat atan a pawtsei leh a, hetihlai hian a pasal Punting Shimrang erawh a awmna chin hriat lohin a la bibo a ni.