Manipur : BJP MLA-in Meitei-te ST status pek tum chungchanga HC thupek a khing

Manipur Legislative Assembly-a Hill Areas Committee (HAC) chairman, BJP MLA Dinganglung Gangmei chuan, Manipur High Court-in Meetei/Meitei hnam Scheduled Tribe (ST) status pek tur chungchanga thupek a tihchhuah chu Supreme Court-ah a khing.

Supreme Court-ah petition a thehluah, MLA Gangmei chuan state sorkar hnena Meitei-te ST status pe tura sorkar laipuia rawtna thlen tura High Court-in a hriattir chu, High Court tih tur a ni lo a, hemi chungchang chu state sorkarin a rel tur a ni, a ti. High Court thupek avanga tualchhung buaina chhuak kal zelah mi tam ta

kin nunna an chan tawh a ni, tiin a sawi bawk.

Gangmei chuan Meitei chu tribal an ni lo a, tribal anga pawm an la ni ngai lo bawk tiin petition-ah hian a tarlang. Meitei hnam zinga ṭhenkhat chu Scheduled Caste (SC) or Other Backward Classes (OBC) category-ah awm mah se, a hnam pum angin Manipur-ah chuan Meitei hi majority leh 'advance' ber an ni tih a sawi.

Churachandpur-ah curfew thlahdul

Meitei leh tribal-te inkara buaina chhuah nasat zualna zinga mi, Churachandpur district-ah chuan boruak a ziaawm chho deuh nia sawi a ni. Nimin zing khan curfew thlahdul a ni a, mipuite pawh an mamawhte lamin an chhuak thei niin PTI chuan a tarlang.

Defence thupuangtu chuan UAV (unamanned aerial vehicle) leh helicoter hmangin Imphal Valley pawh an thlithlai reng tih a sawi.

CM-in all-party meeting ko

Chief minister N Biren Singh chuan Inrinni liam ta khan all-party meeting a ko a, state chhungah boruak ṭha a awm theihna turin assembly constituency tinah peace committee din a nih tur thu a sawi.

Meeting-ah hian Congress, CPI, JD(U), NPF, Shiv Sena, TMC, BSP, AAP, MPP, AIFB, MNDF, ABHKP aiwhte telin, chief minister hlui O Ibobi Singh pawh a tel a ni.
CM hian Inrinni vek khan civil society organisation, Coordinating Committee on Manipur Integrity (COCOMI) leh All Manipur Christian Organization (AMCO) aiawhte a hmu bawk.

Tribal beitu Meitei-te BJP-in an thlawp : Manipur Tribal Forum

Manipur Tribal Forum chuan kar liam ta Inrinni khan Supreme Court-ah petition thehlutin, Manipur tribal-te rawng taka beitu, Meitei-te chu central leh state-a rorellai, BJP chuan a thlawp a ni, an ti.

PIL an thehluhah hian Meitei-te kut tuarin tribal 3

0 an thih bakah, mi dang 132-ten hliam an tuar a, hetichung hian heng mite beihna kaihhnawihah hian FIR ziahluh engmah a la awm lo niin an sawi. "FIR ziahluh a ni lo a, thah leh kutthlak an nih dan chhui zuina a awm lo bawk. Hetih lai hian police-te chu a hnam lian zawk lamah ṭangin, inthahna thlengte chu an lo thlir mai mai a ni," tiin an sawi. Tribal-te beihna thleng chungchang chhui a, a mawphurtute hremna pek an nih ngeina turin Special Investigation Team din an phut.

SIT hi Assam DGP hlui Harekrishna Deka-a'n kaihhruaiin, Meghalaya State Human Rights Commission chairman hlui, chief justice Tinliangthang Vaiphei-a'n enpui bawk se an duh tih an sawi.

President's Rule puang turin phut

Congress party hruaitu, Shashi Tharoor chuan Manipur-a Meitei leh tribal-te inkara buaina nasa tak chhuakah rorellai, BJP chu na taka demin, tharum thawhna leh pawikhawihna thlen mekna Manipur-ah chuan President's Rule puang turin a phut.

Shashi Tharoor chuan "Manipur-a thil thleng mek chungchangah hian India mi, rilru ngil taka thil ngaihtuah tawh phawt chuan rorelna ṭha din an lo tiam kha engtinnge ni ta tiin an inzawt zui vek ang," tiin, state sorkar chu mipuiten an aiawh tura an thlan tlinna chhan hna a thawk thei lo a, hei vang hian President's Rule puan a hun ta a ni, a ti.

Canada-in Manipur-a zin lo turin an mite chah

Canada sorkar chuan Manipur tualchhung buaina thleng mek vangin an mi leh sate chu a ṭul tawp a nih loh chuan Manipur state tlawh lo turin a chah.

Travel advisory a tihchhuah tharah, Canada sorkar chuan May 3 aṭanga Manipur state-a tualchhung buaina chhuak vangin mi eng emaw zatin nunna an chan tawh a, hei vang hian an mi te chu zin rih loh tur leh, Manipur-a awmsate pawh tualchhung thuneitute thuchhuahte zawm a, boruak awm dan thlithlai reng turin a chah bawk.

Irom Sharmila-i'n an state tlawh turin PM leh HM ngen

Civil rights activist Irom Sharmila Chanu chuan an state-a buaina chhuak mekah, Manipur hmeichhiate chu buaina tihreh leh, boruak muan-awm a awm theihna tura hma latu ni turin a ngen.

Sharmila chuan an state-a harsatna awm mek chu a hmun ngeia tlawh a, an hriatthiampui theihna turin prime minister Narendra Modi leh union home minister Amit Shah pawh zin turin a ngen nghal bawk. Sipai tirh luh belh ringawt chu buaina chinfelna a ni lo tih a sawi.

Iron Lady tia hriat lar, Sharmila chuan an state-a buaina leh mipuite tawrhna chuan a rilru a tina takzet tih sawiin, Meitei leh tribal-te chu buaina titawp turin a ngen a; Manipur hmeichhia, eng hnam mi pawh, 'Mother Nature' anga che a, an theihnate chu boruak ṭha siamna tura hmang turin a ngen.

Irom Sharmila hi Manipur-a sipai thuneihna sang pekna, Armed Forces Special Powers Act (AFPSA) tihtawp phuta kum 16 chhung zet chaw ngheia nawrh lo hawihawt tawhtu a ni.

Tualchhung buai­na chhuak mekah Churachanpur-ah Kuki hmeichhiate chuan mipui thinrimin Meitei hnamte kut an thlak tur vengin human chain an siam a, sipai motor hmanga him taka hruai chhuah an nih theihna turin an pui a ni. Hetiang bawk hian Imphal-ah pawh Meitei hmeichhiate chuan tribal zirlaite chu hmun him lama an insaseng theihna turin an pui bawk.