Manipur : Imphal khawpuiah curfew thlahdul; Chief Secretary thar atan Vineet Joshi ruat

Manipur tualchhung buaina chuan ziaawm lam a pan ṭan nia sawi a ni a, nimin zing khan state khawpui Imphal leh hmun dang ṭhenkhatah mipuiten an mamawhte an lamkhawm theihna turin curfew thlahdul a ni. Pathianni khan Churachandpur district-ah hun rei vak lo thlahdul a lo ni tawh bawk.

Curfew thlahdul a nih chhung pawhin drone leh helicopter hmangin buaina chhuahna hmunte chu vil reng a ni a, Army leh Assam Rifles sipaite pawhin hmun hrang hrangah flag march an nei zui reng a ni.

Kar liamta Nilaini aṭang khan tualchhung buaina chhuak vang hian state chhung hmun hrang hrangah curfew hi puan a ni a, nimin khan mamawh lamkhawmna hun atan, zing dar 5 aṭanga 8 thleng an thlahdul.

Meitei leh tribal-te inkara buaina chhuak vang hian mi 52 in nunna an chan tawh a, buaina chhuahna hmuna cheng mi 23,000 vel chu sipaiten hruaichhuakin, sipai hmunahte an khawsa mek a ni. Mi tam tak chu an ṭhenawm state-ah himna zawngin an tlanchhe tawh bawk.

Pathianni khan governor Anusuiya Uikey chuan security advisor Kuldip Singh leh operational commander Ashutosh Sinha-te meeting neihpuiin, an buaina tihtawp a nih theihna atana hma lak dan turte a sawipui.

Union minister for the development of North Eastern Region, G Kishan Reddy chuan sorkar laipuiin Manipur-a intibuai mek, pawl pahnihte chu an buaina chinfel a nih theih nan inbiakna neihpui turin a inpeih reng tih a sawi. Boruak ṭha tak hnuaiah an buaina neih chu chingfel turin a ngen nghal a ni.

Manipur tualchhung buaina thleng vangin state chhuahsan duh mi tam tak an awm mek karah, airlines chuan thlawhtheihna ticket man nasa takin an tipung. Imphal leh Kolkata inkar thlawhtheihna ticket man hi Rs 30,000-te a kai chho nia report a ni a, airlines hrang hrangte flight pawh a full vek zel tih an sawi.

Airports Authority of India (AAI) chuan May 4 leh 6 inkar khan Imphal airport aṭangin flight 108 zet a thlawk chhuak hman tih an sawi. AAI chuan Manipur sorkar nena thawkdunin, airport pan tumte chu police-ten an escort dan turte ruahmanin, help desk te pawh an siam tih an sawi a ni.

Chief Secretary thar ruat

Manipur sorkar chuan tualchhung buaina an tawh mek karah, New Delhi-a deputation-a awm, IAS officer Vineet Joshi pawh ko kirin, Pathianni vek khan chief secretary thar atan a ruat nghal. Joshi hi ministry of education hnuaia higher education department-ah additional secretary-in a awm a ni.

Union cabinet-a Appointments Committe chuan Manipur sorkarin Joshi koh kir a dilna chu a pawmsak hnuah, state governor chuan chief secretary atan a ruat nghal tih Department of Personnel and Administrative Reforms (personnel division) chuan a tarlang.

Joshi hi 1992-batch IAS officer Manipur cadre a ni a, Dr Rajesh Kumar thlakin Manipur secretary-ah dah a ni ta a ni.