Assam-a eptu party 11-in delimitation chungchangah memorandum thehlut

Assam-a eptu party 11-te chuan Assembly leh Lok Sabha constituency siamṭhatna tur, delimitation kalpui mek chungchangah state chief electoral officer (CEO) hnenah memorandum an thehlut.

Eptu party-te chuan delimitation kalpuinaah a hmaa an buaina kha tun thlenga chinfel a la ni lo tih an sawi. Delimitation process hi 2001 census behchhanin, Delimitation Act,2002 hnuaiah kalpui a ni a, mahse hei hi dodalna a tawh nasat avangin hmalakna pawh tihkhawtlai zui a ni. An duhlohna chhante hi tun thlengin a la ngai reng tih an tarlang tel bawk.

Nikum December 27-a Election Commission-in hriattirna a tihchhuah angin, kumin January 1 aṭang khan delimitation process hi kalpui ṭan leh a ni. Mahse eptute chuan sorkarin delimitation process hi a kalpui hmain, party hrang hrangte ngaihdan chu a la ve phawt tur a ni tiin, hei hi ti duh loin sorkar leh rorellai party chuan anmahni duhthu angin an kalpui a, hei hian state chhunga boruak ṭha lo a thlen palh thei a ni, an ti.

CEO hnena memorandum an thehluhah hian Congress, CPI(M), Raijor Dal, Assam Jatiya Parishad, Jatiya Dal Asom, CPI, NCP, CPI (ML), RJD, JD(U) leh TMC hruaituten an hming an ziak a ni.