Buaina chhuakah mi 60 an thi, in 1,700 hal a ni - Manipur CM

Manipur chief minister N Biren Singh chuan an state-a tualchhung buaina chhuakah mi 60 an thi a, hliam 231 awmin, in 1,700 hal a ni tih a sawi. In hal zingah hian sakhaw hmun pawimawhte a tel thu a sawi bawk.

Imphal-a press conference a neihah, Chief Minister chuan buaina chhuak vanga thi chhungte hnenah sorkarin zangnadawmna, Rs nuai 5 ṭheuh leh, hliam tuar na zualte hnenah Rs nuai 2, hliam na vak lote hnenah Rs 25,000 a pe dawn tih a sawi.

CM chuan in 1,700 zet hal niin, heng zingah hian temple leh biak-in a tel thu a sawi a, chenna in an halsakte chu Rs nuai 2 pein, sokarin an in a sak ṭhat sak leh dawn bawk a ni, a ti.

"Manipur-a thil vanduaithlak tak thleng vangin, mi 20,000 chuang chu relief camp-ah an la awm mek a, mi dang 20,000 pawh a rang thei angin hmun him lamah hruai an ni ang. Mihring nunna hi a hlu a, chenna in leh thil dang tihchhiatte pawh pawm theih a ni lo," tiin CM chuan a sawi. Buaina chhuah hnu hian security force-te silai 1,041 ruk chhuahsak an nih thu leh, heng zinga 214 chauh hmuh let a la nih thu a sawi. Security force silai latute chu pe kir leh nghal tura hriattirin, hmuh kir an nih loh chuan a latute manchhuak turin beihpui an thlak dawn tih a sawi bawk.

State sorkar chuan Churachandpur, Ukhrul, Imphal West, Imphal East leh Kangpokpi district-a tangkhang mekte chu anmahni khua leh awmna hmun ṭheuhah him taka hruai kir an nih theihna turin hma a la mek a, cabinet panel pawh din a ni tih a sawi bawk.

Chief Minister security advisor, Kuldeep Singh chuan state chhung boruak pawh a ziaawm zel tih a sawi a, buaina chhuak kaihhnawihah hian FIR 218 ziahluh a ni tawh a ni, a ti.