High Court-in ST list thlak danglam turin thuneihna a nei lo : CJI

Manipur High Court-in Meitei hnam Scheduled Tribe (ST) status pek a tum avanga state chhunga buaina nasa tak a chhuah hnuah, chief justice of India D.Y. Chandrachud chuan High Court hian Scheduled Tribe list tidanglam turin thuneihna a nei lo tih Thawhṭanni khan a sawi.

CJI Chandrachud chuan court emaw, state-in emaw ST list-a awm tur 'belh, paih leh tihdanglam' turin thuneihna an nei lo tih hi a tirah khan Manipur High Court hnenah hian hrilh a ni loh tih sawiin, Scheduled Caste leh Scheduled Tribe-a dah tur chungchang chu President thuneihna a ni, a ti.

Constitution-a Article 342(1)-ah chiang takin, President thuneihna a nih thu hi tarlan a ni.

Kum 2000, November thlaa Constitution Bench-in State of Maharashtra versus Milind chungchang a ngaihtuahnaah khan, "State sorkar, court leh tribunal emaw, thuneitu dangte emawin Article 342-a clause (1)-a Scheduled Tribal list chungchanga hriattirna a tihchhuahte lo thlak leh tihdanglam hi an tih ve tur a ni lo," tiin a sawi.

Bench chuan, "Article 342 Clause (1) hnuaia Scheduled Tribe list-a awm paih emaw, dah belh emaw tur chungchang chu Parliament-in dan a siam hmang chauhin tihdanglam theih a ni a, thuneitu dangin an lo tih tur a ni lo," a ti.