Assam Police-ten Rs vbc 105 tihchingpen kaihhnawihah IAS officer an man

Assam police-te chuan kum 2017-2020 inkara sorkar sum, Rs vbc 105 tihchingpen kaihhnawihah IAS officer suspend lai, Sewali Devi Sharma chu Thawhṭanni khan Ajmer, Rajasthan-ah an man. A rual hian a thurualpui, a makpa contractor Ajit Pal Singh leh midang pakhat man a ni bawk.

Sewali Devi Sharma hi 1992-batch IAS officer, Assam cadre a ni a, state council of educational research and training (SCERT) director a ni ṭhin. He hna a chelh lai, kum 2017-2020 inkara sorkar fund tam tham tak tihchingpen chungchangah suspend a ni a, hemi hnu hian a makpa nen hian state pawnah an tlanchhe zui a ni. Chief Minister Special Vigilance Cell chuan he thubuai hi chhui in, kar liam ta khan mi paruk an lo man tawh bawk a ni.

Assam police-te hian Ajmer police-te puihnain, Jaipur-Ajmer national highway bula hotel aṭangin Sharma leh midangte hi an man a ni. Chief district judge court-ah hruaiin, Guwahati-ah hruai kir nghal an ni.