Itanagar Capital Region (ICR)-ah UAPA hmang

Arunachal Pradesh-a Itanagar Capital Region (ICR)-a mi ṭhenkhatin vawiin, May 10 aṭanga darkar 72 awh bandh huaihawt an tum chu dan kalh a ni tiin, ICR DC Talo Patom chuan Thawhṭanni aṭang Arunachal Pradesh Unlawful Activities (Prevention) Act 2014 hman a ni tih a sawi.

Patom chuan district thuneitute chuan ICR-ah UAPA hman a nih bakah, CrPC Secton144 hnuaiah punkhawm khap a ni tih a sawi bawk.

UAPA hnuaiah hian police-te chuan khawtlang nun tibuai theih zawnga bandh huaihawt tumtute chu hrengin an man thei a ni. Nimin aṭang khan police-te hi khawpui chhungah ngawrh takin an duty zui bawk a ni.

District thuneitu chuan ICR huam chhunga silai zawrhna dawrte chu khar vek turin thupek a tichhuak bawka, silai kawltute pawh an silai leh a mute an hnaih ber police station-a dah turin a ti. Hei bakah hian zu dawrte pawh khar vek tura tih an ni bawk.

Bandh neih turah buaina leh tharum thawhna a chhuah palh venthawn thilah, dawr neitu hrang hrangte pawh an dawr bula pawikhawihna atana hman theih tur hmanrua- lung, iron pipe, tyre leh thildangte chu dahbo vek turin an chah bawk a ni.