Manipur buaina thleng chungchanga PM Modi ṭawngchhuak duh lo AAP-in dem

Aam Aadmi party (AAP) Manipur Unit chuan tun hnaia Manipur tualchhung buaina chhuakah mi tam takin nunna an chan a, in leh sakhaw hmun pawimawh tam tak hal a nih laiin, he thil thleng chungchangah prime minister Narendra Modi ṭawngchhuak duh lo a, a ngawi tlat chu an dem thu an sawi.

AAP state coordinator Thingnam Bishwanath chuan, buaina nasa tak a chhuak chunga Prime Minister a ngawi tlat chu hmarchhak mipuite tan a vanduaithlak hle a ni, a ti.

State chhunga buaina chhuak chu intelligence lam thawh ṭhat tawk loh vangah a puh bawk a, hemi rual hian boruak ṭha siam turin state mipuite chu a ngen a, sorkar pawh national highway-a an state mamawh bungraw phurtu motor-te himna ngaihtuah sak a, internet service pawh tinung tawh turin a ngen.

"A mawhphurhna aṭangin sorkar laipui a tlanchhe thei lo" - Congress

Congress party chuan Manipur-a buaina thleng chungchangah, sorkar laipui chu a mawhphurhna aṭangin a tlanchhe thei lo tih a sawi.

Congress general secretary, Jairam Ramesh chuan chief justice of India-in Scheduled Tribe list tidanglam turin High Court-in thuneihna a nei lo tih a sawichian hnuah, "CJI thusawi kan hriat hnuah, Manipur High Court-a judge pakhat awmna bench-in an state chhunga chhiatna rapthlak tak a thlentir theih dan hi thil mak a ni," a ti. He thil thleng chungchangah hian High Court judge-in Manipur lama a thurualpui leh, centre lama a master-te chu chhiatna rapthlak tak thlenga an mawhphurhna aṭang chuan an tlanchhe thei lo, a ti.