Nagaland NGO-in women vendor-te a pung awm loin loan pe

Nagaland-a NGO, The Entrepreneurs Associates (tEA) chuan hmeichhe dinhmun harsa zawkte chawikanna tura a hmalaknaah, Imphal-a street vendor hmeichhia 20-te hnenah a pung awm loin loan a pe.

Caring Friends Mumbai nena thawkdunin, loan hi Imphal-a an head office-ah an sem a ni. An thawhpui dangte nen a pung awm loin loan hi hmeichhia 1,000 dawn hnenah an lo pe tawh a ni.

tEA hian “Uplifting Women Street Vendors’ Program” hnuaiah loan hi a pe chhuak a, CEO Neichute Doulo chuan an pawl chuan hmeichhiate, a bikin local vendor-te chawikanna turin hma a la zel dawn tih a sawi.

Local entrepreneurship chungchang an zirchianna leh tawnhriat aṭangin, women vendor-ten harsatna an tawh dante chu tEA chuan a hriatpui tih sawiin, Neichute chuan an sum lakluh aṭanga 20% tal chu khawl thei tura hma la turin a fuih bawk.