Assam-in vbc 8,200 hu industryMoU ziak

Assam sorkar chuan an state chhung hmun hrang hranga mega industrial project kalpuina turin, Thawhlehni khan private company-te chu cheng vaibelchhe 8,200 hu memorandum of understanding (MoU) a ziahpui.

Chief minister Himanta Biswa Sarma chuan mega project tam tak siam tur aṭang hian ṭhalaite tan hna 6,100 vel a awm thar phah dawn tih a sawi. Assam-in hma a sawnna tura ring ngamtu private company-te chungah lawmgthu a sawi bawk.

Himanta chuan state sorkar-in investor dang pawh an la biak zel thu sawiin, rei lo teah thil ropui leh chhinchhiah thla tak an tawn ngei a beisei thu a sawi. "Kum 2023 kumtawp lamah industrial summit lian tak neih tum a ni a, thil lian tham tak a thlen ngei pawh kan beisei a, investor-te pawh inbiakna kan neihpui mek a ni," a ti.

Thawhlehni khan MoU Rs vbc 8,200 chuang hu hi ziah a ni a, hengte hi sector hrang hranga invesment tihna tur niin, heng zingah hian FMCG, cement, glass leh electric vehicle lamte a tel.

Sarma chuan Thawhlehnia an ziahte nen, tun hnaiah project hrang hrang thawhna tur Rs vbc 14,000 hu MoU ziah a ni tawh tih sawiin; sorkar laipui, private investor leh state mipuite puihna aṭanga hetiang dinhmun hi thleng thei an ni tih a sawi. "Investment tiduhte tan state chhungah boruak ṭha tak an siam ṭhin avangin Assam mipuite chungah lawmthu kan sawi a ni. Kum hnih chhungin tualchhungah buaina a awm lo a, bandh huaihawt pawh a awm lo a ni," a ti.