Manipur : Imphal East-ah sipaite kah an ni

Manipur-a Meitei leh tribal-te inkara buaina chhuak chuan ziaawm lam a pan zel a, hetih lai hian Nilaini khan Imphal East district-ah hel nia hriatten Assam Rifles sipaite kapin, sipai pakhatin hliam a tuar.

Army chuan Nilaini chawhma dar 11 vel khan Imphal East district-a Dolaithabi area-ah tu tih hriat lohten sipai-te chu ṭum eng emaw zat kapin, an tlanchhe zui nghal tih a sawi. Sipai hliam tuar hi damdawi-inah enkawl mek a ni.

Manipur tualchhung buaina a chhuah hnuah buaina chhuahna bialah Indian Army leh Assam Rifles sipai 10,000 dawnte chu dahin, flag march pawh an la nei chhunzawm zel a, unmanned aerial vehicle (UAV) hmangin boruak awmdan pawh an thlithlai reng bawk. Sipaite hian state chhung bakah, India-Myanmar border pawh an vil bawk a ni.

Buaina chhuakin ziaawm lam a pan avangin district 11-ah curfew puan pawh zing dar 5 aṭangin darkar ruk chhung thlahdul ṭhin a ni.

Defence official-te chuan buaina chhuak vanga hruai chhuah, temporary camp-a awmte pawh mahni in lamah an haw leh ṭan mek tih a sawi.

NEMPF-in ngenna siam

Hmarchhak biala parliament member intelkhawm, North East MPs Forum (NEMPF) chuan Nilaini khan ngenna siamin, Manipur mipuite chu boruak ṭha a awm theihna tura inbengdai turin an ngen. Boruak muanawm a awm theihna atan theihtawp an chhuahpui tur thu an sawi bawk.

Thuchhuah an siamah, NEMPF chairman Kiren Rijiju chuan buaina chhuak vanga nunna chan chhungte an tawrhpui thu a sawi a, mipuite rilru a na a, tharum thawh mai pawh an duh ang tih an hriatthiam pui a, mahse hemi rual hian theihtawpa inbengdai turin a ngen. Tharum thawhna chuan boruak a siamṭha lo a, pawisawi loten an tuar nasa zawk zel a ni, a ti.

ATSUM-in BJP sorkar dem

All Tribal Students’ Union Manipur (ATSUM) chuan an state-a buaina chhuak chungchangah BJP kaihhruai sorkar chu mawhphurtuah puhin an dem thu a sawi.

ATSUM hian May 3 khan Meitei-te Scheduled Tribe (ST) status pek tum duh lohna lantirin, hill district 10-ah kawngzawh an huaihawt a ni. Kawngzawh ni hian Meitei leh tribal inkarte intibuaiin, state chhung hmun hrang hrangah buaina nasa tak a chhuak zui a ni.

"Intihbuaina thleng te, in halte kha sorkarin ngawi rengin lo thlir ringawt loin lo inrawlh nghal se chuan ven theih tur a ni," tiin an thuchhuahah an tarlang. Sorkarin mipuite thunun a tum loh vangin, tharum thawhna nasa tak leh chenna in tam tak hal a nih phah tih an sawi. ATSUM chuan, "State force-te chuan buaina siamtute chu thlawpin, tribal mite chu vengtu nei loin an awm a ni," a ti.