Sikkimese voter chauh huam tur Save Sikkim Party din

Sikkim khawpui, Gangtok-ah Nilaini khan regional political outfit thar, Save Sikkim Party (SSP) din a ni a, he party hi Sikkimese voter chauh huam tura din a ni.

Kaziman Chettri leh Sishir Khadka kaihhruai SSP hian an symbol-ah 'mobile phone' an hmang.

Chettri chuan an party tum ber chu Sikkim tana special status pekna, Article 371F venhim a ni tih sawiin, "Sikkim-ah chuan Certificate of Identification leh Sikkim Subject Certificate holder-te chauhin vote an thlak thei tur a ni. Hei hi Article 371F (k) kaltlanga neih theih chauh a ni. Kan party hian Sikkim ṭhalaite chu Sikkim hi Sikkimese-te ta a ni tiin a kawng a kawhhmuh dawn a ni," a ti.

Sikkim-a ram dang leh state dang mi lut pung zel vanga an state-in harsatna a tawhte chu political party lo awm nghet tawhte chuan an ngaihven lo tih Chettri chuan a sawi a, hetianga pawn lam miin an chim belh zel chuan kum 2029-ah chuan an chief minister leh Lok Sabha member-te pawh non-Sikkimese an ni thei tawh mai dawn a ni, tiin a sawi.