Congress-in Manipur buaina thleng ruahman lawkah an ngai; Boruak ṭha a awm theihna atan President's Rule puan an phût

Congress party chuan Manipur tualchhung buaina nasa tak chhuak chu a hmaa lo ruahman lawk vek a nih thu an sawi a, state chhung boruak a ralmuan leh thuai theihna tura President's Rule puan an phût thu an sawi bawk.

Congress party thupuangtu leh, in-charge Manipur, Bhakta Chara Das chuan tualchhung buaina chhuaka thi chhungte chu zangnadawmna Rs nuai 20 leh, an in halsakte chu Rs nuai 5 ṭheuh pe turin sorkar an phut tih a sawi. Hliam tuarte pawh rang taka enkawlna ṭha pe tur te, buaina chhuak vanga tlanchhiate pawh an in lama an kir leh theihna atana an himna ngaihtuahsak turin an phut tih a sawi.

Das chuan,"Manipur-a buaina chhuak thununna kawngah BJP sorkar chu a hlawhchham der a ni. Tharum thawhna thlengte a titawp thei lo a, ralthuam ruksakte a dan theih loh bakah, ralthuam an ruksak ho pawh a hmu kir thei lo a, pawisawilote a venghim zo lo a, relief camp-a awmte pawh an mamawh angte a pe thei lo bawk a ni," a ti. Hetiang dinhmun an tawn mek avangin, buaina chhuak tihtawp a nih a, boruak ṭha a awm theihna turin President's Rule puang nghal turin an phut tih a sawi a ni.

Congress party hruaitu chuan, dan leh thupek dik taka kenkawh ni se hetiang buaina nasa tak hi a chhuah a rinawm lo tih sawiin, "A hma aṭanga ruahman lawk vek a ang a ni, a chhan chu sorkar laipui lam aṭangin he buaina thleng thlithlai tur hi tumah an awm lo a ni," a ti. Manipur-a Meitei pawl pahnih, Arambai Tenngol leh Meitei Leepun-te chu RSS leh Bajrang Dal nena khaikhinin, state chhunga hlauhna leh inhuatna thehdarhah a puh a, heng pawl pahnihte hian Manipur chief minister N Biren Singh-a mitmei an hmu nia a lan thu a sawi bawk.

Mi tam takin nunna an chan hnu leh, in leh sakhaw hmun pawimawhte hal a nih a, himna zawnga mi tam tak an tlanchhiat hnuah pawh, tun thlengin union home miniter Amit Shah chuan Manipur hi a la tlawh lo a, prime minister Narendra Modi pawhin a twitter lamah takngial pawh boruak ṭha siam tura ngenna pawh a la ziak lang lo a ni, tiin Das chuan a sawi.

Bishnupur district-a hel nia hriatten police 1 kaphlum

Manipur-a Bishnupur district-a Tera Khongfangbi bulah Ningani khan hel nia hriatten police-te beiin, police pakhat an kap hlum a, mi dang pali an hliam. Hliam zinga pakhat chu a dinhmun a ṭha lo hle tih official-te chuan an sawi.

Inkahna thlenna hmun hi Manipur tualchhung buaina chhuah ṭanna, Torbung aṭanga hla vak lo nia sawi a ni. Police-te hian hel dapa beihpui an thlak laiin helho hi an lo kap niin official-te chuan an sawi a, Torbung aṭang hian hel nia hriatte hian mi pahnih an ru bo tih an sawi bawk.