Manipur tribal MLA-ten inrelbawlna hran an duh

Manipur-a tribal MLA-te chuan thuchhuah siamin, Manipur-a tribal-te tana inrelbawlna hran siamsak an duh thu an sawi.

Thuchhuah siamtute hi Kuki MLA 10-te niin, 'Manipur hnuaiah chuan kan mite chu an awm ve thei tawh lo a ni," tiin, tribal-te huatna a intuh nasa tawh a; MLA, minister, pastor, police leh civil officer-te, naupang leh hmeichhiate thlengin an zuah tawh lo a, chenna in leh sakhaw hmun pawimawh thlengin tihchhiatsak an ni tih an sawii. Tlangrama cheng, tribal-te chunga tharum thawhna nasa tak thlentu hnam tam zawk Meitei chu state sorkar chu an thlawp a, he thil thleng hian Manipur aṭang tirbal-te a tihrang a ni, an ti.

Thuchhuah siamtu MLA 10 zingah hian BJP MLA panga, JD-U MLA pahnih, Kuki People's Alliance (KPA) MLA pahnih bakah Independent pakhat an tel.

Tribal MLA-te chuan tualchhung buaina nasa tak chhuakah buaina siamtu leh pawikhawihtute thlawpah state-a BJP sorkar chu an puh. "Manipur state chuan min venghim zo lo a, hei vang hian sorkar laipui chu ram danpui hnuaiah inrelbawlna hran min pe a, Manipur ṭhenawma ni zawka boruak muanawm tak hnuaia kan awm min phalsak turin kan ngen an ni," an ti. Mipuite nen pawh inrawnin, hma lak zel dan tur pawh an ngaihtuah tih an sawi bawk.

Hetih lai hian Manipur sorkar chuan tualchhung buaina chu thunun ni tawhin, boruak pawhin ngai a awh chho ṭan niin a sawi. Buaina chhuak kaihhnawihah mi 30 man an ni tawh. State sorkar thupuangtu, Th Basanta Kumar Singh chuan boruak muanawm a awm leh theihna turin sorkar chuan hma a la zel tih a sawi a, hemi rual hian sorkar chuan inkahhai a lo puan tawh, helpawlte awmna camp-te pawh a endik leh a, ralthuam kawl an neih leh neih lohte pawh Manipur Police leh Assam Rifles-ten an endik thu a sawi.