Meghalaya CM-in heliport leh airport siam rawtna thlen
Meghalaya chief minister Conrad K Sangma chuan kar liam ta khan New Delhi-ah civil aviation minister Jyotiraditya Scindia hmuin, an state tourism tihchangtlunna atan leh, economy lama hma an sawnna turin heliport leh international airport siam rawtna a thlen.
Shillong airport hmanlai chu a runway a tawi avangin thlawhtheihna lian chi an ṭum thei lo a, Garo Hills district-a Baljek airport chu hman lohin a awm bawk.
CM Sangma chuan, Union Minister hnenah hian Shillong leh Tura-ah heliport siam a, an state-ah international airport siam leh Baljek airport pawh hmang tura ngenna a thlen thu a sawi.
Meghalaya High Court chuan Shillong airport chu thlawhtheihna lian chi ṭum theih tura tihlen theih a nih tawh loh avangin, greenfield airport siamna tur ram ngaihtuah turin state sorkar a lo hrilh tawh a ni. Hemi rual hian state sorkar leh central sorkarin airport thar siam hi an tum lo a nih chuan, court chu lo inrawlh a tum hran loh thu a sawi nghal bawk.