AP : ILP nei loa Chakma lutte chhui chian phut

Arunachal Pradesh-a Forum of Indigenous People Rights and Social Justice (FIPRSI) chuan an state-a inner line permit (ILP) nei loa Chakma hnam lut awm chungchang chu central bureau of investigation (CBI) chhui tir an phut.

FIPRSI chuan dan loa an state-a Chakma lut an awm thu chu sawi a ni fo a, mahse finfiahna an nei mai lo tih sawiin, "Mahse tun hnaiah anmahni Chakma ngeiin hei hi an sawilang a ni. May 5, 2023 khan Uttar Pradesh-a mi, Rita Chakma chuan Arunachal Pradesh chief secretary, Director General of Police (DGP) leh EAC Diyun hnenah Mizoram aṭangin Chakma pakhat, Uttam Chakma chu Namsai kaltlangin Arunachal Pradesh-ah ILP nei loin a lut tih a rawn hrilh a, a chunga action la turin a rawn ngen bawk a ni," tiin an tarlang.

Complaint thehluttu hian Uttam Chakma chu Chakma Tribal Sangh president a nih thu leh, AP-a a awm chuan dan leh thupek dinhmun pawh a ti him lo thei a ni tiin, ILP a neih leh neih loh enfiah a, AP-a awmna pawh photo ID nena finfiah turin a ngen tih FIPRSI chuan an sawi.

Diyun police-te chuan complaint thehluh hi an chhui zui mek a, he thil hi state dinhmun leh himna thlenga tiderthawng thei thil a nih avangin, sorkar chuan Chakma leh Hajong hnam, state dang aṭanga lutte chu thuneitute hnena in report zel tura hriattir tura an duh thu an sawi. Rita Chakma-i complaint aṭangin, Chakma-te chu state hrang hrang aṭanga rawn kal an nih avangin hemi chungchang hi CBI-in chhui ngei se an duh thu an sawi. Hei bakah hian AP zirlai pawl, AAPSU chu an state-a non-tribal awmte ILP endik sak ṭhin tura an duh thu an sawi bawk.