Manipur CM-in Amit Shah leh JP Nadda a hmu

Manipur chief minister N Biren Singh chuan Pathianni khan New Delhi-ah union home minister Amit Shah leh BJP president JP Nadda-te a hmu. Chief Minister hi a cabinet minister pali leh BJP state president Sarada Devi-ten an ṭawiawm.

State sorkar thupuangtu Sapam Ranjan Singh chuan Chief Minister hian meeting an neih chungchang hi Imphal-a press conference a neihah a sawi dawn tih a tarlang. CM hi Pathianni zan vek khan Manipur-ah a haw leh nghal a ni.

Manipur tualchhung buaina thleng chungchangah CM leh a ṭhuihhruaite hi Delhi-ah hian party hotute hian an ko nia sawi a ni. Meeting hi Amit Shah chenna inah an nei a ni.

CM Singh chuan Home Minister leh BJP President-te chu Manipur dinhmun leh, tribal MLA-te thil phut chungchangte a sawi. Meitei leh tribal inkara buaina nasa tak a chhuah hnuah, Manipur-a tribal MLA 10-te chuan tribal-te chenna biala inrelbawlna hran siamsak an duh thu an sawi.

Manipur tualchhung dinhmun pawhin ngai a awh chho ṭan zel nia sawi ani a, mahse tribal MLA-te thil phut hian Meitei leh tribal, a bikin Kuki te inkarah inhriatthiam lohna a thlen a, buaina nasa zawk a chawh chhuah palh leh a hlauhthawnawm hle niin Home Ministry official chuan a sawi. Amit Shah pawhin CM Singh hnenah hian hemi chungchang hi fimkhur taka kalpui a, buaina a chhuah nawn tawh lohna tura hma la turin a hrilh.

Meitei leh tribal-te inkara buaina chhuakah khan mi 60 in nunna an chan niin CM chuan a sawi a, chenna in bakah sakhaw hmun pawimawh tam tak hal a ni bawk. Manipur-ah Meitei hi hnam lian ber niin, an state mipui 53% vel an tling a, hetih lai hian tribal - Naga, Kuki leh hnamdangte chu 40% vel niin, hill district-ah an cheng a ni.

Delhi-ah Meitei-ten lungawi lohna lantir

Pathianni vek khan Delhi-a Jantar Mantar-ah Meitei hnamten lungawi lohna an lantir a, Manipur-a dan loa lutte dapchhuah a, thawn haw an nih theihna turin National Register of Citizens (NRC) hman an phut tih an sawi.

Hei bakah hian Kuki tamna bial, hill district-a cheng Meitei-te chu buaina chhuak vanga an tlanchhiat hnuah, Kuki helten an vau avangin an in lamah tun thlengin an la kir leh thei lo niin an sawi bawk.

Jantar Mantar-a nawrh huaihawttu, World Meitei Council chairman Heigrujam Nabashyam chuan dan loa lutte dapchhuah chu tuna an state tana an mamawh ber leh, state leilung fate humhalh theihna tur a ni, a ti. Dan loa lutten an chim zel avangin Meitei hnam chuan ram danpui hnuaiah an hnam humhalh leh venhimsak turin kum 11 zet a lo bei tawh tih a sawi.

Hetih lai hian Kuki chuan Meitei chu an state-a hnam lian ber, sum leh pai dinhmunah pawh dinhmun ṭha zawk an ni a, hetichunga tribal-te chanpual an chuh ve theihna tura Scheduled Tribe category-a dah chu an remti ngai dawn lo tih sawiin, ST status pek an nih chuan Meitei chuan tribal-te kut aṭangin sorkar aṭanga hamṭhatna awm leh an ram thlengin an laksak vek dawn niin an sawi thung.